baat karnii mujhe mushkil kabhii aisii to na thii

baat karnii mujhe mushkil kabhii aisii to na thii
jaisii ab hai terii mehfil kabhii aisii to na thii

(mushkil : difficult; mehfil : gathering)

le gayaa chhiin ke kaun aaj teraa sabr-o-qarar
be-qaraarii tujhe ai dil kabhii aisii to na thii

(sabr-o-qaraar : patience and tranquility; be-qaraarii : restlessness)

chashm-e-qaatil merii dushman thii hameshaa lekin
jaise ab ho ga’ii qaatil kabhii aisii to na thii

(chashm-e-qaatil : deadly glances/eyes; dushman : enemy; qaatil : murderer)

un kii aaNkhoN ne Khudaa jaane kiyaa kyaa jaaduu
ke tabiiyat merii maa’il kabhii aisii to na thii

(tabiiyat : nature; maa’il : inclination)

aks-e-ruKh-e-yaar ne kis se hai tujhe chamkaayaa
taab tujh meN maah-e-kaamil kabhii aisii to na thii

(aks : reflection; ruKh-e-yaar : face of the beloved; chamkaayaa : shine; taab : power; maah : moon; kaamil : integral)

kyaa sabab tuu jo bigaRtaa hai “Zafar” se har baar
Khuu terii huur-e-shamaa’il kabhii aisii to na thii

(sabab : reason; Khuu : disposition, nature; huur-e-shimaa’il : like a nymph)